Coñezamos algo máis sobre peixes e mariscos

España aparece como un dos países de maior consumo de peixe e marisco, aínda que se observa que na infancia e adolescencia etapas nas que se instauran os hábitos alimentarios máis sólidos, o número de veces, días e formas de consumir peixe necesita reforzo. Ademais, existen diferenzas notables entre rexións e nada ten que ver o número de veces que se consome no Norte e Noroeste peninsular con outras rexións do interior, da costa e insulares.

O peixe e o marisco, xunto cos seus produtos derivados, son alimentos cun interesante perfil nutritivo: ricos en proteínas de calidade, abundantes en ácidos graxos omega 3 e omega 6, fonte de minerais (fósforo, potasio, sodio, calcio, magnesio, ferro, iodo); así como de diversas vitaminas (B1, B2, B3, B12, A, D). Por este motivo, e segundo o consenso de numerosos profesionais dedicados ao estudo da Nutrición e as Ciencias da Saúde, débese alternar o consumo de peixes con outras fontes proteicas de orixe animal (carnes, ovos e lácteos) ou vexetal (legumes, cereais e froitos secos). Polas características nutritivas de peixes e mariscos, os expertos recomendan que a ración de consumo sexa de 125-150 g (peso neto), e o seu consumo sexa como mínimo de 3 veces por semana.