Bacaladilla, lirio ou perlita

A bacaladilla, tamén coñecida co nome de lirio ou perlita, pertence á familia dos Gádidos, a mesma que o bacallau. A súa talla é, con todo, inferior, a súa carne posúe unha textura suave e un sabor agradable, e o maior inconveniente é que resulta difícil de conservar

Onde se pesca?

As bacaladillas son peixes gregarios, como as anchoas ou as sardiñas, e viven nas costas bañadas polo océano Atlántico a profundidades considerables de entre 100 e 3.000 metros, aínda que é moi común atopar bancos de peixes a 200 ó 400 metros de profundidade. Tamén poden pescarse no mar do Norte. No caso da costa española, áchanse no mar Mediterráneo e no Cantábrico, sobre todo en Asturias, rexión na que é moi apreciada e recibe o nome de abril, bacalá ou liriu.

As especies máis coñecidas

A especie común de bacaladilla que chega ao mercado español é a Micromensistius poutassou. Nos países de América do Sur bañados polas augas do Atlántico e do Pacífico abunda unha especie de bacaladilla, a denominada bacaladilla austral (Micromesistius australis), de tamaño inferior e cunha carne máis compacta e de mellor calidade que a da bacaladilla común.

Características

• Forma: Posúe un corpo forte e fusiforme. A súa cabeza é grande e con forma triangular
• Talla mínima: 15 cm.
• Cor: Gris azulado na parte dorsal e esbrancuxado na ventral (zona do ventre).
• Lonxitude e peso: Pode alcanzar os 50 centímetros de longo, aínda que o máis frecuente é que mida de 15 a 30 cm. O seu peso medio rolda os 300 gramos. As femias son de maior tamaño que os machos.
• Alimentación: Aliméntase de pequenos crustáceos. Cando aumenta de tamaño come tamén peixes pequenos e cefalópodos.