Bacallau

O bacallau é un apreciado peixe que pertence á familia dos Gádidos, orde dos Gadiformes. Da mesma familia que o bacallau son o abadexo, o carboeiro, a brótola e a faneca. Existen unhas 60 especies distintas, aínda que o máis coñecido e de maior importancia comercial é o bacallau común.

Onde se pesca?

O bacallau é unha especie propia de mares fríos e tépedos do norte (entre 4 e 6 graos de temperatura) e establece o seu hábitat a profundidades de 500 a 600 metros, aínda que é común que nade a uns 150 ou 200 metros. Localízase principalmente no Atlántico Norte, desde Carolina do Norte até Groenlandia, desde o golfo de Biscaia até a Canle da Mancha, así como no mar do Norte e o Báltico. Os maiores caladoiros de bacallau do mundo atópanse no mar de Barents, cerca do Ártico.

O bacallau de tempada é o que se pesca desde finais de outono até a primavera, aínda que se dispón durante todo o ano de bacallau salgado, desecado, afumado ou conxelado.

As especies máis coñecidas

Gadus morhua callaris. Especie europea localizada no mar Báltico.

Gadus morhua morhua. Especie europea que se atopa nas zonas que van do golfo de Biscaia até o mar de Barents.

Gadus macrocephalus. Especie tamén coñecida co nome de bacallau do Pacífico.

Gadus ogac. Nome co que se denomina ao bacallau de Groenlandia.

Características

• Forma: O seu corpo é robusto e alargado. Ten tres aletas dorsais, dous anais, unha cola non bifurcada e unha pequena barba na mandíbula inferior.
• Talla mínima: No mar do Norte fixan como talla mínima de captura as pezas de 30 cm, mentres que no Cantábrico a talla mínima é de 35 cm.
• Cor: A pigmentación varía segundo o ambiente. É arroxada na zona mariña rica en algas, averdada nas zonas nas que abundan as herbas mariñas e gris clara nos fondos de area. Os exemplares máis novos adoitan presentar unhas manchas sobre o dorso e os laterais e un armazón en forma de rede de cor arroxada.
• Lonxitude e peso: O bacallau é un peixe de tamaño medio. Adoita medir entre 50 e 80 cm.de lonxitude e pesar de 40 a 45 quilos, aínda que hai exemplares que chegan a pesar até 90 quilos e a medir 1,8 metros de lonxitude.
• Alimentación: é omnívoro e aliméntase de zooplancton, vermes, moluscos e crustáceos. Os exemplares adultos comen tamén peixes pequenos, sobre todo arenques.