Ezpata-arraina

Ezpata-arraina arrain erdi-gantzatsua da (4 gramo gantz baino gehixeago dauka 100 gramo bakoitzeko). Proteinen edukia ez da oso handia, nahiz eta balio biologiko handikotzat jotzen diren funtsezko aminoazido guztiak dituztelako. Hainbat bitamina eta mineral ditu. Bitaminen artean, B multzokoak nabarmentzen dira (B3, B6 eta B12), eta B9 ere bai, proportzio txikiagoan. B3 bitamina edo niazina kopuru handitan agertzen da ezpata-arrainean, nahiz eta ez diren bikainak, adibidez, atunak edo hegaluzeak dituenekin alderatuz gero. Bitamina horrek lagundu egiten du energia lortzen makronutrienteetatik, hau da, karbohidratoetatik, gantzetatik eta proteinetatik, eta, gainera, beste funtzio batzuk ere baditu, hala nola sexu-hormonak ekoiztea eta glukogenoa sintetizatzea (glukosa-erreserba gibelean eta muskuluan).

B6 eta B12 bitaminak kopuru ertainetan agertzen dira ezpata-arrainean, beste arrain batzuekin alderatuta. B9aren kasuan, arrainaren edukia nabarmen murrizten da, beroarekiko duen sentikortasunagatik. B9 bitaminaren ekarpen egokia funtsezkoa da globulu gorriak eta zuriak ekoizteko eta ontzeko eta material genetikoa sintetizatzeko.

Ezpata-arrainaren osaeran bitamina liposolubleen presentzia nabarmentzen da, A eta D bitaminen agerpena, adibidez. A bitaminak mukosak, azala eta gorputzeko beste ehun batzuk mantentzen, hazten eta konpontzen laguntzen du. Gainera, infekzioei aurre egiten laguntzen du, eta beharrezkoa da nerbio-sistemaren garapenerako eta gaueko ikusmenerako. Hezurren hazkuntzan ere parte hartzen du, eta gibeleko entzimen eta sexu-hormonen eta giltzurrun gaineko hormonen ekoizpenean ere parte hartzen du. Bestetik, D bitaminak kaltzioa xurgatzen, hezurretan metatzen eta odolean metatzen laguntzen du.

Dituen mineralei dagokienez, fosforoa, potasioa eta selenioa ditu, eta magnesioa, berriz, kopuru txikiagoetan. Fosforoa hezurretan eta hortzetan dago, eta zelulen barruko eta kanpoko mantentze-lan hidrikoan, nerbio- eta muskulu-jardueran eta energiaren erabileran parte hartzen du. Potasioa nerbio-sistemak eta muskuluen jarduerak ongi funtzionatzeko beharrezkoa den minerala da, eta zelularen barruko eta kanpoko uraren orekan parte hartzen du. Selenioa antioxidatzailea da, eta gantzen metabolismoan eta sistema immunologikoan ere parte hartzen du.

Magnesioa hestearen, nerbioen eta muskuluen funtzionamenduarekin erlazionatzen da. Immunitatea ere hobetzen du eta eragin laxante leuna du.

Gainerako arrain freskoekin alderatuta, sodio asko du ezpata-arrainak (116 miligramo 100 gramoko). Hala ere, mineral horretan aberatsak diren beste elikagai batzuekin alderatuz gero, hala nola gaztekin (500 eta 1000 miligramo 100 gramoko) edo arrain-kontserbekin (500 eta 800 miligramo 100 gramoko), ikusten da ezpata-arrainean dagoen sodio kantitatea ez dela garrantzitsua.

mcg = mikrogramoak