Amuarraina

Amuarraina arrain erdigantzatsua da, izan ere, 3 gramo gantz ematen ditu 100 gramo bakoitzeko. Balio biologiko handiko proteinak ditu, baina beste arrain batzuek baino kopuru txikiagoetan, baita bitaminak eta mineralak ere.

Oso elikagai nutritiboa da, eta erraz prestatzen bada, dieta hipokaloriko eta gantz gutxikoen parte izan daiteke. Bere haragiak potasio, fosforo eta selenioaren ekarpen interesgarria egiten du, eta sodio, magnesio, burdina eta zinkarena, gainerako arrain freskoekin alderatuta. Potasioa nerbio-sistemarako eta muskuluen jarduerarako beharrezko minerala da, eta sodioarekin batera parte hartzen du zelularen barruko eta kanpoko ur-orekan. Bestetik, fosforoa hezur eta hortzetan dago. Nerbio-sisteman eta muskuluen jardueran ere parte hartzen du, eta energia lortzeko prozesuetan ere parte hartzen du. Selenioa antioxidatzailea da, eta gantzen metabolismoan eta sistema immunologikoan ere parte hartzen du.

Magnesioa hestearen, nerbioen eta muskuluen funtzionamenduarekin erlazionatzen da, hezur eta hortzen parte izateaz gain. Immunitatea hobetzen du eta eragin laxante leuna du. Burdina beharrezkoa da hemoglobina -oxigenoa biriketatik zelula guztietara garraiatzen duen proteina- sortzeko, eta bere ekarpen egokiak anemia ferropenikoa prebenitzen du. Zinkak parte hartzen du makronutrienteen metabolismoan (karbohidratoak, proteinak eta gantzak), sexu-organoen garapenean eta dastamenaren eta usaimenaren funtzionamenduan.

B multzoko bitaminen artean, B3, B6 eta B12 nabarmentzen dira. Dena den, bitamina horien edukia ez da hain garrantzitsua mantenugai horietan aberatsak diren beste elikagai batzuekin alderatuz gero (labore integralak, lekaleak, hosto berdeko barazkiak, haragiak). Oro har, bitamina horiei esker energia-nutrienteak (karbohidratoak, gantzak eta proteinak) aprobetxa daitezke, eta prozesu askotan parte hartzen dute, hala nola sexu-hormonen eraketan, material genetikoaren sintesian eta nerbio-sistemaren funtzionamenduan. Bitamina liposolubleei dagokienez, amuarrainak D bitamina dauka kopuru handitan, eta proportzio txikiagoan E bitamina, gibelean eta muskuluan metatzen duena. D bitaminak odoleko kaltzio-maila erregulatzen du, eta mineral hori hezurretan xurgatzen eta finkatzen laguntzen du. E bitaminak dituen funtzioen artean, eragin antioxidatzailea nabarmentzen da, hau da, zenbait endekapenezko gaixotasunen, gaixotasun kardiobaskularren eta minbiziaren aurkako babes-faktorea da.

mcg = mikrogramoak